កំពង់ចាម៖ អភិបាលខេត្តកំពង់ចាម លោក អ៊ុន ចាន់ដា បានបញ្ជាក់ថា ក្នុងខេត្តកំពង់ចាមទាំងមូលមានផ្ទះពលរដ្ឋចំនួនជាង ២១ម៉ឺនខ្នងក្នុងភូមិចំនួន ៩២១ភូមិមានអគ្គិសនីប្រើប្រាស់ ស្មើនឹង ៩៩,៧៨ភាគរយ ពោលនៅសល់តែចំនួន ២ភូមិទៀតប៉ុណ្ណោះមិនទាន់មានអគ្គិសនីប្រើប្រាស់។
អភិបាលខេត្តកំពង់ចាម លោក អ៊ុន ចាន់ដា បានបញ្ជាក់នៅក្នុងសន្និសីទសារព័ត៌មានស្តីពី «ភាពជោគជ័យក្នុងរយៈពេល ៥ឆ្នាំរបស់រដ្ឋបាលខេត្តកំពង់ចាម» នាព្រឹកថ្ងៃទី០៣ ខែកុម្ភៈ ឆ្នាំ២០២៣ ថា ភូមិចំនួន២ដែលមិនទាន់មានអគ្គិសនីប្រើប្រាស់នោះគឺដោយសារតែភូមិទាំង២នោះស្ថិតនៅទីតាំងដាច់ស្រយាលដែលលំបាកក្នុងការតភ្ជាប់ចរន្តអគ្គិសនី។
លោក អ៊ុន ចាន់ដា ថ្លែងដូច្នេះថា៖ «តាមពិតទៅយើងក៏មានផែនការក្នុងឆ្នាំ២០២១ ប៉ុន្តែពាក់ព័ន្ធនឹងបញ្ហាអូសបណ្តាញមានភាពស្មុគស្មាញ ដោយភូមិរបស់ពួកគាត់នៅទីដាច់ស្រយាលឆ្ងាយពីបណ្តាញមេ ហើយភូមិមួយទៀតគឺជាកោះ អ៊ីចឹងបង្កភាពស្មុគស្មាញក្នុងការតចរន្តដែលធ្វើឱ្យខកខានភ្ជាប់ចរន្តជូនពលរដ្ឋ»។
លោកថាតែយ៉ាងណាមិញ ភូមិទាំង២នោះនៅតែមានអគ្គិសនីប្រើប្រាស់តាមរយៈការប្រើប្រាស់ម៉ាស៊ីនភ្លើង និងប្រើប្រាស់អំពូលភ្លើងសូឡា។
លោកអភិបាលខេត្តបន្តថា ខេត្តកំពង់ចាមមានអនុស្ថានីយ៍ចំនួន២កន្លែង ដោយមួយកន្លែងនៅក្នុងឃុំក្រឡា ស្រុកកំពង់សៀម ដែលមានអនុភាពថាមពលចំនួន ៣០០មេកាវ៉ាត់ និងមួយកន្លែងទៀតនៅក្នុងឃុំព្រែកក់ ស្រុកស្ទឹងត្រង់ មានអនុភាពថាមពលចំនួន ៥០មេកាវ៉ាត់។
ជាមួយគ្នានេះក្នុងខេត្តមានក្រុមហ៊ុនផ្គត់ផ្គង់ និងចែកចាយអគ្គិសនីរដ្ឋ និងឯកជនចំនួន ៤១ក្រុមហ៊ុនដែលមានដែនអាជ្ញាបណ្ណអគ្គិសនីគ្រប់ដណ្តប់លើក្រុងស្រុកចំនួន១០ ដែលមានភូមិចំនួន ៩២៣ភូមិ៕
